قوة
يوم الاثنين حضرت ندوة بثنويتنا القالها محامي اسمه عادل مادري شنو سوري نسيت اسم عايلته
عجبتني الندوة واايد كان يتكلم عن القانون و انا غرامي شغلة المحاماة و احب سوالف القانون انشالله ادش حقوق بعد ما اتخرج من الثنويه
المهم قال شغلة استوعبت انها صج او بالاصح كنت ادري بس توني استوعب و افكر ليش
"الكويت اقل دولة فيها تطبيق للقانون"
ليش يعني؟ مثلاً اذا واحد كان رابط الحزام نقول عنه معقد او نتطنز عليه .. او اذا واحد ماشي على السرعه المحدده نطقله هرنات عشان يدوس لان احنا دايسين .. يعني معناته بالكويت اللي يطبق القانون مو ريال او مريض نفسياً
و قال قصص صراحه تعور القلب انا عيني قامت تدمع
يقول رحت مستشفى الرازي مرة قال شفت واحد جنه مومياء يعني مجبس من راسه لي اصابع ريله سادحينه على بطنه و في فتحه من تحت السرير عشان يطلع ويهه و يتنفس و مجابلته السستر و حاطتله مجلة من تحت السرير اذا خلص الصفحه يقولها قلبيها .. يقول دش الدكتور و سأل المومياء .. احمد شلونك؟ قاله الحمدلله .. يقول جان اسأل الدكتور شسالفة احمد قاله الدكتور احمد ولد عمره 17 سنه صارله سنة تقريباً على هالحاله و باقيله سنة و نص بعد!! راح البر مع ربعه و ركبوا بانشيات .. طلعوا عالخط السريع و يت سياره بسرعه حتى ما يمديها تدوس بريك من السرعه جان تدعمه اهو مع 2 من ربعه .. واحد حوضه انكسر و ريله انكسرت .. و الثاني ريله و ايده انكسرو .. اما احمد اكثر واحد تأثر بالحادث .. و امه من اول ما صار الحادث و اهي تبجي بهستيريا ما مر على الحادث شهرين جان تموت الام من كثر ما اهي متأثره بحالة ولدها و تبجي .. و احمد ما يدري ان امه متوفيه كل مره يسأل عنها يدوروله اي عذر
كل هذا عشان احمد و ربعه و السياره خالفو القانون
و قال قصه ثانيه بعد
واحد اسمه مشعل يدرس حقوق بمصر اول حفيد و الكل مستانس عليه .. جمال و اخلاق و صوت .. درس سنه حقوق بمصر و سمع عن ستار اكاديمي و سأل اهله اكمل حقوق ولا ادش ستار اكاديمي قالوله لا كمل حقوق هذا مستقبلك .. كمل دراسته لما تخرج و رد الكويت يوم الثلاثا 3-1-2006 و يوم الاربعا قعد مع اهله و سوالف و كان باجر اللي اهو 5-1 عيد ميلاده قالوا مدام ان مشعل رد نروح البر منها وناسه و منها نسويله مفاجأة هناك و كانو شاريله كيكه و خالته شاريتله ورده .. يوم الخميس طلعوا بجم سياره و اهو بسيكله قالهم امشوا و انا ألحقكم .. المهم مشوا و لحقهم و صارت بينهم و بين مشعل جم سياره يعني ما قاموا يشوفونه و كل شوي يدقون عليه يطمنون عليه .. المهم دقوا بعدين ما رد عليهم و دقوا مره ثانيه هم ما يرد .. صفطوا عاليمين ينطرونه .. 10 دقايق ربع ساعه نص ساعه ,, ساعه للحين ما وصل .. اخوه اصغر منه عمره 19 كان اخر واحد يعني طلع متأخر و ما يدري ان اهله قاعدين ينطرون مشعل و ان مشعل مو معاهم .. بالطريج شاف زحمه و ناس متيمعين .. اهو مو نوعه ان اذا شاف زحمه يتطمش بس سبحان الله حس .. راح بيشوف ولا الشرطي يقوله خير!! قاله لا بس بشوف منو .. انصدم ان اللي متيمعين عليه الناس اهو مشعل .. ولما خذوه المستشفى ما كان فيه ولا جرح ولا شلخ بس نزيف داخلي بالمخ .. اهله لما دروا بالسالفه انهاروا و بجوا عليه بجي و الصدمه اللي اكبر ان مشعل توفى !! و اهله لي يومكم هذا ما يدرون شلون صار الحادث .. يمكن بعضكم ما تأثر بالسالفه مثلي انا ما كنت وايد متأثره بالسالفه بس كسرو خاطري .. بس بعدين عقب ما خلصت الندوه حضرت صناعي مع بنت خالتي .. و كانت الابله تسألنا عن الندوة (لان الندوه مالت قسم الصناعي و الابله نفسها اهي اللي داقه عالمحامي و متفقه معاه حق الندوة) قلنالها ان حلوه و سألتنا عن سالفة مشعل .. و بعدين قامت تسولف جان تعيد السالفه و تقول ان مشعل يصير ولد اختها و ان اهيا اللي شاريتله الورده بعيد ميلاده و كانت كاتبتله مع الورده جمله نسيتها (اهديلك ورده يا غالي طولت في غيابك ليالي) جنه جذي .. ان قصدها لما سافر يدرس برا طول الغيبه .. و بعدين عيونها قامت تدمع جان ابجي انا مع البنات كلهم بجوا :( و قالت ان اهيا قايله حق المحامي السالفه عشان يقولها بالندوة .. و تقول كان في مسابقة جنه بغراس او مادري وين .. احسن تعبير حق موقف من خلال بوستر او جمله .. تقول انهم سووا بوستر فيه صورة واحد لابس خوذه و راكب سيكل و يمه ورده و حاطين الجمله الي كانت كاتبتله اياها .. و فازوا بالمركز الرابع .. قالها المحامي ان يبي البوستر و انشالله راح يحطون البوستر بالشوارع
مشعل رد الكويت يوم الثلاثا بشهادة و تخرج من الحقوق و كانت امنيته يصير محامي .. الاربعا قعد مع اهله .. و توفى الخميس بعيد ميلاده قبل ما يحقق امنيته
فرجاءاً رجاءاً حاولوا كثر ما تقدرون انكم تطبقون القانون .. ولا تاخذون الموضوع لعب و ضحك .. يعني انشالله الله لا يقوله لا تنطرون يصير فيكم شي عشان بعدين تتحسفون
ناطره تعليقاتكم
posted by 7saweya at 10:14:00 PM
وايد حلو البوست
مع انه محزن بس في جم جملة فطسوني من الضحك
الله يستر علينا جميعا
مشكوره:)