7saweya

مالي و مال الناس يلفونني سفهاً .. ديني لنفسي .. و دين الناس ، للناس

about

Name: 7saweya 7saweya
From: el-jabriya, Kuwait
About me: انسانة بسيطة و معقدة .. عبقرية و غبية الى حد ما.. معجبة بأفكار و ثقافة الغرب، طموحة، دقيقة في كل شيء، ماكرة أحياناً، أمتلك شخصيتين.. شخصية أتعامل بها مع كل الناس بدون استثناء و شخصية أتعامل بها مع نفسي فقط
More..

Pannasmontata calendar

Sunday, July 16, 2006

الصيفي و ما أدراك ما الصيفي

هاي
اليوم رديت من الثنوية مزاجي حددددددددده اوكي مو كالعادة .. مادري ليش .. حتى ابوي اول ما شافني يقولي ها شاقة الحلج شصاير
المهم انا بخاطري اسولف عن البويات و المسخرة اللي قاعدة تصير بالثنويات

حضرت ندوة الاسبوع اللي طاف بالثنوية كانت تلقيها داعية تتكلم عن البويات .. قالت كلمة صراحة ضحكت بروحي جني مينونة بعدين اكتشفت ان اللي قالته ما يضحك لول اندقرت .. قالت جنة البويات في الدنيا المسيلة .. استوعبت ان صج .. 2 من رفيجاتي كانوا يمي و جدامنا وحدة قاعدة تتكلم بالموبايل .. صوتها عالي يعني لو بس تسكت الداعية بتاخذ نفس تسمعها الناظرة و توديها ورا الشمس .. المهم سمعتها تقول "يلا عاد حبيبتي لا تزعلين والله مو قصدي" احنا قلنا هذي قاعدة تكلم البوي فرند تبعها على اساس ان بنت و عبالها احنا حمير ما نفهم .. شوي اسمعها تقول "يلا تعالي انا بالندوة لا تزعلين اسفة مو قصدي" اي شي صح؟ طلعت تكلم بويتها .. شوي ولا تيي قصدي ايي .. تعرفون الرجل الاخضر؟ هذي جذي بس خالة سودة عبدة رمادية كحلية جلحة ملحة .. و نفس المشية (لول لاعت جبدي منه كثر ماشوفه من اخوي الصغير علمني على هالسوالف) المهم يعني ياية مطنقرة جان تمسك ايدها و تلمها يعني بتراضيها!!! يا لهول المشهد .. انا سمعت ان في جذي بس ما سمعت ان في اشكرة و جدام الابلات بعد .. بس اشوف ابو عيالها رضا بالاخير لول .. و كانت الداعية قاعدة تقول سالفة اسامي بنات المسيلة اللي منتشرة جان تقوم بوية و تقول انا اللي كاتبتهم .. جان نشوف جيش .. اي جيش من البويات يايلها ركض من ورا .. طقوها طقققققققققققققققققققق و احنا منصدمين .. اول مرة اشوف جذي جدامي ويع ويع ويع .. بعدين طلع ان فيها صرع جان يخلونها عالارض طايحة و راسها كله دم .. و حبيبتها يمها تبجي جان تييلها بوية و تدزها من اول الغرفة لي عند الباب .. احنا حالتنا صعبة مبطلين حلوجنا .. قلنا خل نطلع قبل لا يدخلونا بالسالفة و نحصل لنا جم طراق عالماشي

قاعدة مع رفيجاتي .. بوية كانت واقفة يمنا تقريباً تنطر وحدة .. مرت اللي كانت ناطرتها شايلة جنطة مدرسة جان تقولها ثقيلة عليج؟ اشيلها عنج؟ انا و بنت خالي ما نطوف .. قعدنا نطنز عليها لي اخر الدوام

عندنا وحدة بالثنوية شعرها مأساااااااااااااااااااااااة .. تسوي عنقوص .. تخيلوا شعرها لي الشباصة اشقر .. تحت الشباصة اسود .. لول عيزانة تكملين الصبغة؟ شافتها وحدة جان تقولها ويع اشكرة .. جان تقولها منو ويع .. قالتلها انتي .. قالتلها شكو .. قالتلها انتي جبح وي .. لول طع شلون هذيك نجرية .. المفروض حتى لو شعرها خايس هذيك مالها شغل فيها كيفها البنت يعني اذا تبي تعيب خل تعيب بينها و بين نفسها او مع رفيجاتها مو جذي اشكرة .. المهم صارت هوشة اخر شي اتفقوا ان الثانية تييب حق ام شعر صبغ لول :D

عند باب الثنوية في صعيدية تشتغل بثنويتنا تبيع برد .. المهم و انا قاعدة اسولف مع رفيجاتي سمعت الحارس يسألها ها وصل 100؟ تقوله اي يوم الخميس .. اي شي برد يوصل 100 باسبوع؟ صج بواقين .. اقول حق بنت خالتي مادري اقعد انافسها و اكشت بالدوام لول

المهم الله يعيننا .. ادعولي الله يصبرني على الجو البديع و ناظرة هالثنوية الجميلة و العجيبة و المرحة و المتساهلة (طل) تقولنا بنات حطوا كرنيهاتكم (بطاقة الطالبة) عشان نعرف ان انتو بالثنوية لان في بنات يلبسون ملابس ثنوية و يدوش يأذونكم و يسوون اشياء مو زينة (لول ماكو شغل طع العذر) لا و تقولنا ترا حلوين لونهم وردي مو مثل فراشات المستوصفات هذيل غير احلى
نلتقي ببوست ثاني
باي

posted by 7saweya at 1:42:00 PM

| Permalink |

19 Comments:

At July 16, 2006 2:58 PM, Si7LeYa

لووووول

يحلاتج وياحلات سوالفج والله

استمتعت ببوستج

وسالفه البويات

ماقول الا الله يستر عليهم هالميانين

ويردهم لعقولهم

واقووول ترى انا حساويه حالي من حالج فشرايج ابيع معاج برد

:p

لوول تسلمين عزيزتي وان شاء الله كلها جم اسبوع ويخلص الصيفي وترتاحين

.. تحياتي ..
At July 17, 2006 12:22 PM, sarah

هههههههههههههههاي

والله سجن نسائي بفيلم مصري مو مدرسة
..
ضحكتيني على الرجل الاخضر
والله انج صاجة انا اختي تقول لي عن المسيلة عاد سفرتنا للكويت بعد اسبوعين شكلي بروح اشوف
;)

احنا هنيه هم بعد سوالف البويات بس مو اشكره جذيه لا يخافون
بس الحين صايرين البويات جريئات عادي تقول فلانة حبيبتي ومرتبطة معها وهالسوالف
الله يستر علينا بس
بس تصدقين هم عايشين الوضع ومصدقة انها تحبها لا وبعضهم يرفضون الزواج عشان ماتخون حبيبتها
هههههههههاي
شهالمسخرة
....
At July 18, 2006 8:50 AM, SILVER RAIN

:"""""""""""( بوووووووستج ذكرني بثريا لااابارج الله فيها

سنتين وشاكة فيها انها بوية وتطرش رسايل غرام وحب واخرتها اعترفتلي انها بوية لوووووول وتخانقت معاها صارت حاقدة علي

تطمشي عليهم ماكو شغل :Pp
At July 18, 2006 5:47 PM, chatterbox

لو انا منج جان اروح اطق اي احد بس اطلع حرتي
قطيعة شالمدرسة الخايسة
At July 18, 2006 8:08 PM, MARSHAL Q8

يا إلهي .. يا لهول المشهد :P

والله طول عمري اضحك على سوالف بنات الثانويه

قاصين عليكم @@

خل اقولكم سالفه واصلتلي ..

بنيه شاطره وتشارك ودفترها جنه كتاب الوليد بن طلال اليديد من كثر ماهو مرتب والوان وشغل عدل
وواجبات تحل وكل شي

آخر شي الابله حطت لها 4 ونص بالشفوي

انزين ليش يا بنت الحلال ..

والله هالبنت ما تيي تسالني بعد الساعه وبالفرصه @@ شلون احط لها خمسه

لوووووووووول

وانا اموت واعرف منو الفاضيه اللي تقوم من النوم وتروح ثانويه مو ثانويتها علشان تتحرش بالاوادم :)

حساويه .. استمري

بلوقج فاكهة البلوقات
At July 18, 2006 8:08 PM, MARSHAL Q8

This comment has been removed by a blog administrator.
At July 18, 2006 9:15 PM, 7saweya

si7leya:
و النعم والله و النعم :D
اوكي تبيعين معاي يعني تساعديني بس ما لج نصيب .. والله قنوعة بعد عمري انتي :D
الله يسلمج

sarah:
عاد المسيلة ام المسخرة ولا تشوفين البنات لما يسوون اغراءات حق البويات ويييييييييييييع تلوع جبدج
اقول احنا عندنا بالثنوية وحدة تقعد بحضن الثانية و اذا خزيتيهم يعني ترا ويع .. ما يكسرون عينهم جنه يقولولج شايفتنا مسوين شي غلط!

silver rain:
اي هذا اللي قاعده اسويه .. لا تشوفينا انا و رفيجاتي .. تخيلي احنا 9 .. اذا بنسولف نقعد يم بعض مو وحدة مجابلة الثانية .. يعني على قعدتنا تقولين رايحين مسرحية .. كل هذا عشان نطمش

chatterbox:
تبين تنصدمين اكثر؟
في بنات اييبون معاهم جناط مكياج و يحطون المكياج بالحمام و مايوه يلبسونه تحت ملابس الثنوية و (تان) و ملابس طلعة و شامبو لول يعني اللي يشوفهم يقول رايحين يتشمسون مو يدرسون

marshal_q8:
عادي الابلات والله في بعضهم ملعن
مادري والله .. لا و اليوم شتقولنا الناظرة بنات رجاءاً ما نبي هواش ترا نيي لي عندكم و نفصل كل البنات المتسببين بالهوشة .. ما كان في هوشة بس اهي جنها تقولنا تهاوشوا غيروا الروتين لول خبلة والله مو صاحية
ثانكس عالاطراء

ثانكس على مروركم
عاد كان بخاطري شي ودي اقوله بس نسيته
اللي يذكرني اعطيه جائزة :p
At July 19, 2006 1:51 AM, Q8-eye

الصراحة أنا مصدوووووم *_*

ما توقعت انه هالسوالف موجودة علني عند البنات !!

الله يستر ويحفظ خواتنا وأهل ديرتنا

تتوقعون شنو السبب الي يخلي "البويات) موجودين في المجتمع؟؟
At July 21, 2006 1:23 AM, 7saweya

q8-eye:
لا علني ليش خشاشي
السبب اهو البنات اللي معطينهم ويه و وحدة تقلد الثانية
و ثانكس على مرورك
At July 22, 2006 7:10 AM, R7eeq

لوووول ,,,

الحمدالله والشكر ,,,

ياربي استر علينا وعلى بناتنا ,,

.........

الله يعينج على الصيفي ويوفقج يارب ,,

: )
At July 30, 2006 10:11 PM, a7laa7ob

من صجج انتي عادي البويات صار شي اساسي بالحياة عادي اشكره شفتيهم بالمسيلة والاكوابارك
مسخره
ومثل ماقالت جاتربوكس لو انا مكانج جان اطب وياهم
وانتي شعليج من الصعيديه
وسلميلي على الناظره
والله يعينج على الجووووووو
مسكينه احترقت من الشمس صايره سوده بللللللللل
At July 31, 2006 2:48 PM, 7saweya

r7eeq:
والله مادري شيردون .. اجمعين :D
ثانكس على مرورج

a7laa7ob:
ها يالبيضة :p
!!!!!!!! شعلي من الصعيدية
اقول تقدرين باسبوع تييبين 100 :D
!!!!
مسكينة هااا .. قولي محترة يالبيضة :p
ثانكس على مرورج
At August 01, 2006 4:05 PM, a7laa7ob

حق شنو 100 بالضبط يالسوده
At August 01, 2006 7:07 PM, 7saweya

اقول سكتي بس سكتي يعني بتبينيلهم انج قاعدة على بنك و ال100 عندج مثل الربع دينار لول
و بعدين انا جم مرة اعلمج انا برونزية مو سودة يالمحترة يالبيضة يالزلمة :D
بطيح بالبحر كل يوم بروح عشان ما يرد لوني و بعدين تطنزين لول
At August 02, 2006 1:00 AM, a7laa7ob

اذا تبين ال 100 حق شي مهم ترى رقبتي سداده
اشوه اليوم بنت خالتي ((المليقه))عندنا وقالت انه بدى يتقشر اللون
وتعالي متى تخلصين امتحانات عشان نروح بنت عمج المحترمه شكلها راحت البقره وماقالت لي ولا دقت
At August 02, 2006 3:38 AM, 3ateeja

ههههههههههههههه واي انا ببلوقج صج اصير مينونه واقعد اضحك ..عيل اتفقوا ان تييب لها صبغ ههههههههههه

الله يستر على بناتنا بستره ..أللهم لاشماته الله يعين اهلهم الصراحه اول مره اسمع جذي
At August 02, 2006 9:42 AM, 7saweya

a7laa7ob:
اهم شييييييييييييي .. والله عندنا خير بس تدرين حساوية ليش نصرفهم .. نخشهم حق اليوم الاسود اللي ما راح ايي :D
لأ منو قال .. انا قصيت عليها واهي صدقت :p
يوم السبت اخلص الساعة 9 .. ارد البيت و ادق عليج عشان نروح على طول .. نروح على طول = يمديها تصير 1 و احنا بعدنا ما رحنا لول

3ateeja:
عاد اليوم شفتها معاي بالامتحان للحين ما صبغت شعرها الظاهر هذيك مفلسة لول
شفتي شلون
ثانكس على مرورج
At August 02, 2006 1:50 PM, a7laa7ob

خلاص اوكي لالا انا اقعد مبجر خووو
خلصي ومريني تدرين مااقدر اروح بالفراري يبيلها طريج طويل والمسيله قريبه وايد
والبنتلي بالوكاله سيرفس
عاد انتي مريني مع سايقكم عبدالمجيد
At August 02, 2006 5:54 PM, 7saweya

عيل الكايين وينه؟
وي صح نسيت .. مليتي منه و عطيتيه رفيجتج :p
اي خير انشالله تقعدين مبجر .. نفس آخر مرة قعدتي 7 بالضبط نفس ما قلتي :p
اوكي حجية بيننا ألو